Ужо 16 памерлі. У Беларусі прызналі 1486 выпадкаў каранавірусу, плюс 420 за дзень
Паводле БелТА, на 6 раніцы 9 красавіка (магчыма, статыстыка актуальная на вечар 8-га — Мінздароўя атрымлівае зьвесткі ў 8 раніцы і 18 вечара):
- 1331 пацыентаў з каранавірусам шпіталізаваныя;
- 139 выпісаныя здаровымі;
- памерлі 16 інфікаваных каранавірусам — прызнаныя тры новыя сьмерці;
- разам гэта дае 1486 прызнаных выпадкаў — плюс 420 выпадкаў за дзень;
- у краіне праведзена з пачатку эпідэміі звыш 49 тысяч тэстаў на новы каранавірус.
Статыстыка па абласьцях на 9 красавіка выглядала наступным чынам (паводле дзяржаўнага агенцтва БелТА, міністэрства такой не публікуе):
- Менск — 699 чалавек шпіталізавана, 102 выпісаныя, 6 памерлі.
- Менская вобласьць — 153 шпіталізаваныя, 1 выпісаны, 3 памерлі.
- Віцебская вобласьць — 364 шпіталізаваныя, 35 выпісаныя, 7 памерлі.
- Гомельская вобласьць — 35 шпіталізаваных, 1 выпісаны, 0 памерлых.
- Магілёўская вобласьць — 35 шпіталізаваных, выпісаных і памерлых няма.
- Горадзенская вобласьць — 28 шпіталізаваных, выпісаных і памерлых няма.
- Берасьцейская вобласьць — 17 шпіталізаваных, выпісаных і памерлых няма.
Беларусы ў пандэміі: «немцы» ці «швэйкі»?
Ці дэманструюць беларусы сваю цягу да парадку падчас пандэміі, сваё азначэньне як «усходнеславянскіх немцаў»? Ці ўводзіцца ў Беларусі «паўзучы» карантын? Калі ў Беларусі будзе ўведзены карантын, ці будуць беларусы выконваць яго ўмовы ці паводзіць сябе, як Швэйк?
Па гэтых пытаньнях у «Праскім акцэнце» спрачаюцца аглядальнік Свабоды Дзьмітры Гурневіч і намесьнік рэдактара газэты «Наша ніва» Зьміцер Панкавец.
Гурневіч
- Пандэмія паказала, што мы паводзім сябе не як немцы, а як партызаны.
- Беларусы ў масе сваёй не паверылі ў пагрозу пандэміі. І не таму, што так сказаў Лукашэнка і тэлевізар.
- Я днямі адважыўся праехаць у мэтро ў Празе і быў адзіным чалавекам у вагоне.
- Ня ўсім у Чэхіі падабаецца карантын, людзі страчваюць працу. Але выбару іншага няма.
- Я быў бы за варыянт, каб людзі самі сябе абмяжоўвалі.
Панкавец
- Мы фанатыкі орднунгу зь вялікай умоўнасьцю.
- Літаральна за тыдзень колькасьць людзей у масках вырасла ў разы.
- Мяне, па шчырасьці, зьдзіўляе, калі 30-гадовыя бугаі сыходзяць у самаізаляцыю.
- Незразумела, якім чынам усе краіны, якія ўвялі дастаткова жорсткія меры, будуць зь іх выходзіць.
- Няўжо людзі не разумеюць, што беларускі карантын — гэта будзе не траваедны карантын, як у Вялікай Брытаніі ці Чэхіі.
У Барысаве памёр 50-гадовы фэльчар хуткай дапамогі: пнэўманія і станоўчы тэст на каранавірус
У рэанімацыі 2-й клінічнай лякарні Барысава памёр фэльчар хуткай дапамогі Васіль Ліпілін. Яму было 50 гадоў.
Паводле калегі мэдыка, у мужчыны была двухбаковая пнэўманія і станоўчы вынік тэсту на каранавірус.
Ліпілін з жонкай жыў у аграгарадку Неманіца, за 10 кілямэтраў ад Барысава. Разам яны трымалі фэрмэрскую гаспадарку. Па словах калегі, Васіль адчуў сябе кепска 28 сакавіка. У яго паднялася высокая тэмпэратура, ён папрасіўся памяняцца зьменамі.
Да панядзелка 30 сакавіка паляпшэньня ня здарылася, ён зьвярнуўся ў паліклініку са скаргамі на тэмпэратуру і моцныя цягліцавыя болі.
4 красавіка Ліпіліна ў цяжкім стане даставілі ў рэанімацыю 2-й клінічнай лякарні Барысава, увечары таго ж дня падключылі да апарата штучнай вэнтыляцыі лёгкіх. Першы тэст на каранавірус даў адмоўны вынік, другі — станоўчы.
У калегаў з хуткай дапамогі як кантактаў першага ўзроўню таксама ўзялі мазкі, аднак яны працягваюць працаваць. Трое зь іх цяпер знаходзяцца на бальнічным зь невялікай тэмпэратурай і сымптомамі вострай рэсьпіраторнай віруснай інфэкцыі.
Дырэктар клінікі з Бостану зьвярнуўся да Лукашэнкі: не паўтарайце памылак ЗША!
Былы мянчук, уладальнік і дырэктар клінікі-сэрвісу сацыяльнага дагляду Right at Home ў Бостане (ЗША) Ўладзімер Зархін праз Радыё Свабода зьвярнуўся да Аляксандра Лукашэнкі з заклікам неадкладна ўвесьці ў Беларусі карантын.
«Масачусэтс, як і іншыя штаты, спазьніўся, — расказвае ён. — У выніку наша сыстэма аховы здароўя знаходзіцца цяпер у вельмі цяжкай сытуацыі — не хапае масак, не хапае пальчатак, не хапае іншых сродкаў індывідуальнай абароны. Больш за тое, тыя ўстановы, дзе жывуць пажылыя людзі — дамы састарэлых і спэцыялізаваныя шпіталі — сталі рассаднікамі новай інфэкцыі. Гэта адбылося таму, што своечасова не была праведзеная іх карантынізацыя. Адтуль хваля інфэкцыі пайшла на звычайныя бальніцы Бостана і цалкам захліснула іх. На гэтым тыдні мы чакаем пік сьмяротнасьці».
У Беларусі прынялі новыя правілы самаізаляцыі. Штрафаў няма, але будуць
Пастановай Савету міністраў Беларусі, апублікаванай 9 красавіка, у краіне ўводзіцца азначэньне абмежавальнага захаду — самаізаляцыі. Гэтая самаізаляцыя не дабраахвотная, як будуць караць за яе парушэньні, яшчэ ня вырашылі.
Пакараньне за парушэньне самаізаляцыі будзе «адпаведна заканадаўчым актам», але гэтыя акты толькі плянуюць прыняць. Пакуль дакладна вядома, што парушальнікам будуць налічваць толькі 50% выплаты па непрацаздольнасьці, але могуць прадугледзець і адміністрацыйную адказнасьць.
Каго гэта тычыцца
Пад самаізаляцыяй разумеюць ізаляцыю дома «або ў іншых умовах» людзей, якія:
- прыбылі зь «эпідэмічна неспрыяльных краінаў»;
- якія кантактавалі з асобамі з інфэкцыйнымі захворваньнямі, або з асобамі-носьбітамі ўзбуджальнікаў, або з асобамі, якія былі на стадыі выздараўленьня пасьля інфэкцыйных захворваньняў;
- хварэюць на COVID-19;
- адносяцца да «кантактаў першага ўзроўню» з хворымі на COVID-19 (ізаляцыя на 14 дзён з апошняга кантакту);
- адносяцца да «кантактаў другога ўзроўню» і маюць сымптомы рэсьпіраторных інфэкцыяў.
Крытэры аднясеньня да «кантактаў» яшчэ мае вызначыць Мінздароўя.
Выпраўленым на самаізаляцыю будуць выдаваць «патрабаваньне выкананьня правілаў паводзінаў у самаізаляцыі». Але ў якім парадку выдаваць гэтае патрабаваньне, яшчэ мусіць вызначыць Мінздароўя.
Эўразьвяз заплянаваў даць Беларусі 60 млн эўра на барацьбу з каранавірусам
Дапамога Беларусі будзе аказаная ў межах глябальнай праграмы падтрымкі ўдзельнікаў Усходняга партнэрства, сярод якіх Армэнія, Азэрбайджан, Грузія, Малдова і Ўкраіна.
Агулам на дапамогу краінам Усходняга партнэрства Эўразьвяз выдзеліць 963 млн эўра. У рамках гэтай праграмы Эўракамісія плянуе накіраваць 80 млн эўра на неадкладныя патрэбы і да 883 млн — на сярэдне- і доўгатэрміновыя патрэбы для падтрымкі сацыяльнага і эканамічнага аднаўленьня рэгіёну пасьля пандэміі.
Кожная з краінаў Усходняга партнэрства атрымае пэўны аб'ём дапамогі. Беларусі плянуецца даць больш за 60 млн эўра на неадкладныя і сярэднетэрміновыя патрэбы: напрыклад на куплю аўтамабіляў хуткай дапамогі і рэсьпіратараў, а таксама на трансьмежныя праекты.
У межах гэтай праграмы дапамогі Армэніі выдзяляецца 92 млн эўра, Азэрбайджану — 14 млн, Грузіі — 183 млн, Малдове — 87 млн, Украіне — 190 млн эўра.
Ахвярай каранавірусу стаў ураджай гародніны і садавіны ў Флорыдзе
Тысячы тонаў садавіны і гародніны згнілі гэтай вясной на фэрмэрскіх палях Флорыды, стаўшы нечаканай ахвярай пандэміі каранавірусу.
Кабачкі, жоўтыя гарбузы, памідоры не былі своечасова сабраныя і прапалі, бо фэрмэры ня могуць прадаць ураджай сваім сталым кліентам — закрытым праз пандэмію рэстаранам, паркам забаў і школам па ўсёй краіне.
Папраўдзе, з такімі ж праблемамі сутыкнуліся і іншыя штаты: ад наступстваў пандэміі пацярпелі, у прыватнасьці, каліфарнійскія фэрмэры, якія вырошчваюць зяленіва, і вытворцы малака ў Вэрмонце і Вісконсіне.
ЗША абагналі Гішпанію ў колькасьці сьмерцяў ад каранавірусу
У ЗША распаўсюд вірусу працягваецца, але колькасьць новых зафіксаваных выпадкаў на дзень перастала расьці паскоранымі тэмпамі (максымум выпадкаў на дзень было 4 красавіка). Ды колькасьць сьмерцяў на дзень працягвае павялічвацца — 7 і 8 красавіка ў Штатах памерлі па больш як 1900 хворых на каранавірус. Хуткасьць таго, як стан пацыентаў пагаршаецца і як вірус даводзіць да сьмерці, шакуе дактароў у Нью-Ёрку, піша Reuters.
ЗША ўжо абагналі Гішпанію паводле агульнай колькасьці сьмерцяў і, калі цяперашнія тэмпы захаваюцца, празь некалькі дзён абгоняць Італію і выйдуць на першае месца ў колькасьці ахвяраў COVID-19.
У Італіі ж працягвае расьці колькасьць «актыўных выпадкаў» хваробы, але паступова спадае колькасьць новых выпадкаў на дзень і новых сьмерцяў на дзень. За 8 красавіка там зафіксавалі 3836 новыя выпадкі, 542 новыя сьмерці, 2099 новых выпісаных пацыентаў.
Колькасьць штодзённых новых выпадкаў і новых сьмерцяў стабілізавалася або спадае таксама ў Гішпаніі і Іране, новых выпадкаў (але не штодзённых сьмерцяў) — у Нямеччыне. Пастаянны паскораны рост колькасьці хворых цяпер назіраецца ў Турэччыне, якая выйшла на 9-е месца ў сьвеце паводле агульнай колькасьці выпадкаў COVID-19.
Лічбы на раніцу 9 красавіка
- У сьвеце зафіксавалі каля 1,52 мільёна выпадкаў COVID-19: 435 тысяч у ЗША, 148 тысяч у Гішпаніі, больш за 139 тысяч у Італіі, па 113 тысяч у Францыі і Нямеччыне, звыш 82 тысяч у Кітаі, больш за 64 тысячы ў Іране, звыш 60 тысяч у Вялікай Брытаніі, больш за 38 тысяч у Турэччыне, больш як па 23 тысячы ў Швайцарыі і Бэльгіі.
- Ад хваробаў, якія выклікаў новы каранавірус, у сьвеце памерлі 88 505 чалавек. Зь іх 17 669 у Італіі, 14 795 у ЗША, 14 792 у Гішпаніі, 10 869 у Францыі, 7 097 у Вялікай Брытаніі, 3 993 у Іране, 3 339 у Кітаі.
- Выпісалі 330 тысяч пацыентаў, якія паправіліся ад COVID-19. «Актыўных выпадкаў» хваробы застаецца больш за 1,099 млн, зь іх звыш 48 тысяч знаходзяцца ў цяжкім стане.
- У Беларусі, паводле афіцыйных зьвестак на 8 красавіка, пацьверджана 1066 выпадкаў COVID-19, памерлі 13 чалавек, выпісаныя здаровымі 77 пацыентаў. Лекары ананімна заяўляюць, што ня ўсім хворым ставяць адпаведны дыягназ.
Каб не прынесьлі каранавірус дахаты. Адзін зь менскіх гатэляў пачалі засяляць мэдыкамі
Менгарвыканкам выдзеліў для сталічных мэдыкаў гатэль «Іст Тайм», разьлічаны на 250 чалавек. Цяпер у гатэль засяляюць лекараў 10-й клінічнай бальніцы.
Паводле крыніцы Tut.by лекараў засяляюць у аднамесныя нумары. Першапачаткова ў сьпісах 24 чалавека.
Адзін з новых пастаяльцаў патлумачыў, што такая ізаляцыя важная, каб лекары, якія кантактуюць з хворымі на каранавірус, не заразілі сваякоў.
Першапачаткова лекары 10 клінічнага шпіталю разглядалі варыянт ізаляцыі ў гатэлі «Юбілейны». Але не дамовіліся наконт цаны: спачатку мэдыкам прапанавалі плаціць па 5-7 рублёў за суткі, а падчас афармленьня папераў зьявілася сума 20 рублёў за суткі. Такім чынам выходзіла па 600 рублёў за месяц.
Паводле першага намесьніка старшыні камітэту па ахове здароўя Менгарвыканкаму Дзьмітрыя Чараднічэнкі, у гатэлі захацелі жыць каля 100 чалавек. Пакуль мэдыкаў селяць па адным у нумар. Для іх арганізуюць бясплатнае трохразовае харчаваньне. На працу іх будуць вазіць аўтобусамі.
Гатэль «Іст тайм» месьціцца насупраць Усходняга аўтавакзалу. Ад яго да 10-й бальніцы 8 кілямэтраў.
У клірыка праваслаўнай царквы ў Менску знайшлі каранавірус
Клірык служыў у храме Пакрова Прасьвятой Багародзіцы на праспэкце Пераможцаў, 82. Цяпер ён разам з усёй сям’ёй на лячэньні, піша «Наша ніва».
Гэтую інфармацыю пацьвердзіў настаяцель храма Віктар Белякоў. «Учора пацвердзіўся каранавірус. Дактары праінфармавалі нас уначы, сёньня бралі мазкі ў сьвятароў. Цяпер мы знаходзімся на самаізаляцыі. Калі вынік на каранавірус будзе адмоўны, то праз чатырнаццаць дзён ад апошняга кантакта з носьбітам зможам выйсьці з самаізаляцыі», – кажа Віктар Белякоў.
Апошні раз заражанага клірыка сьвятары бачылі ў суботу, 4 красавіка. Айцец Віктар Белякоў спадзяецца, што калі тэст на каранавірус будзе адмоўным, то ў храме магчыма будзе яшчэ правесьці велікодную службу.
Сам клірык пакінуў у сваіх сацсетках наступны запіс: «Прашу малітваў за ўсю сям’ю: С., В., Я. і І. Мы ў бальніцах: жонцы з дзецьмі цяжка. У дзіцячай інфэкцыёнцы няма ўмоў для маленькіх дзетак пагодак».
Бацька рэжысэра Курэйчыка ў шпіталі. У санаторыі МУС ён кантактаваў з хворым на каранавірус
Кантакт меў месца ў сакавіку, калі Ўладзімер Курэйчык адпачываў у санаторыі МУС на Нарачы.
8 красавіка яго шпіталізавалі, сказаў Радыё Свабода рэжысэр Андрэй Курэйчык.
«Бацька — пэнсіянэр МУС. З кім канкрэтна ён кантактаваў, я ня ведаю. Але гэта быў сусед за сталом у сталовай. Як і ва ўсіх санаторыях, іх саджаюць разам за нейкія сталы. І вось гэта быў адзін з суседзяў па стале. Яго забралі з двухбаковай пнэўманіяй яшчэ ў сакавіку. Відаць, цяпер усё пацьвердзілася. І ўсіх, хто быў побач, забралі як кантакты першага ўзроўню», — кажа Андрэй Курэйчык.
У настаўніцы менскай школы пацьвердзілі каранавірус
У сярэдняй школе № 61 на вуліцы Кірылы Тураўскага ў Менску, недалёка ад станцыі мэтро «Ўсход», каранавірус пацьвердзілі ў настаўніцы пачатковых клясаў. Кантакты першага ўзроўню выяўленыя, цяпер яны на самаізаляцыі.
Пра гэта стала вядома ад бацькоў вучняў. Ва ўпраўленьні адукацыі Свабодзе пацьвердзілі гэтую інфармацыю. Падрабязна тут >>
Фэдэрацыя хакея Беларусі прыпыніла ўсе дзіцяча-юнацкія спаборніцтвы
З 8 красавіка адкрытае першынства краіны сярод юніёраў і юнакоў і рэспубліканскія спаборніцтвы сярод юнакоў прыпынілі на нявызначаны тэрмін, паведамляе сайт фэдэрацыі.
Silver Screen закрывае дзьве траціны сваіх кінатэатраў
- З 9 красавіка кінатэатры ў менскіх гандлёвых цэнтрах Galileo і ARENAcity часова зачыняць.
- Кінатэатар VOKA cinema ў гандлёвым цэнтры Dana Mall працягвае працаваць у бясьпечным рэжыме Safe seats.
- З 9 красавіка Silver Screen у Dana Mall таксама прапануе менчукам паслугу «Асабісты кінатэатар» — магчымасьць арандаваць адну з заляў прыватнага кінатэатру для індывідуальнага карыстаньня. Каштаваць такая паслуга будзе 99 рублёў за дзьве гадзіны.
- Дзеяньне падарункавых картаў (на 50-100-150 рублёў) працягнуць да канца 2020 году.
Менская крама адмаўлялася абслугоўваць людзей з кашлем і чханьнем. Фатафакт
Такая абвестка была на дзьвярах менскай крамы «Амі мэбля» на Маякоўскага, 18. Пазьней гэтую абвестку зьнялі з прычыны скаргаў пакупнікоў.
На прадпрыемстве, дзе выпускаюць матэрыялы для мэдычных масак, знайшлі каранавірус
59-гадовы супрацоўнік прадпрыемства «Сьветлагорск-Хімвалакно», дзе выпускаюць матэрыялы для запатрабаваных цяпер мэдычных масак, заразіўся каранавірусам. Пра гэта ягоныя калегі даведаліся 8 красавіка. Мужчыну адправілі ў Гомель.
Мэдыкі забралі пад назіраньне кантакты першага ўзроўню — гэта брыгада хворага, якая складаецца з 9 чалавек. У адміністрацыі прадпрыемства цяпер вырашаюць, як мінімалізаваць рызыку распаўсюджваньня вірусу бяз шкоды для вытворчасьці. Магчыма, частку людзей адправяць у адпачынак, бо спыніць вытворчасьць ня могуць. Падрабязнасьці па спасылцы >>
У Гомельскім унівэрсытэце Скарыны пачалі 3D-друк ахоўных шчыткоў для мэдыкаў
Друкаваць ахоўныя шчыткі на 3D-друкарках пачалі на факультэце фізыкі і інфармацыйных тэхналёгій Гомельскага дзяржаўнага ўнівэрсытэта імя Ф. Скарыны. Да ініцыятывы далучыліся некалькі вытворчых прадпрыемстваў Гомля. Сабекошт адной такой маскі з улікам выдаткаў на электраэнэргію — каля 5 рублёў, але мэдыкам іх будуць раздаваць бясплатна, паведамляе Interfax.by cа спасылкай на мясцовы тэлеканал.
«Згарэў» за 5 гадзін. Сям’я 36-гадовага менчука сьцьвярджае, што ён памёр з каранавірусам
Як расказалі родныя, 4 красавіка мужчына, як звычайна, пайшоў на працу. Пасьля абеду яму зрабілася блага, пачаў задыхацца. Пасьпеў пазваніць жонцы, тая выклікала хуткую. Мэдыкі завезьлі мужчыну ў шпіталь хуткай дапамогі. Увечары таго ж дня ён памёр.
«У яго здарылася кровазьліцьцё ў мозг. З гэтым ён трапіў у шпіталь. У шпіталі сказалі: „Паражэньне лёгкіх“, якога характару — не сказалі. У панядзелак [6 красавіка] сказалі, што ў яго станоўчы вынік на Covid (Covid-19. — РС), двухбаковае запаленьне лёгкіх было, што справакавала інсульт», — кажа адна са сваячак.
Паводле родных, N. усё жыцьцё меў выдатнае здароўе, ня меў хранічных захворваньняў, ніколі не ляжаў у шпіталі, ня скардзіўся на дробныя недамаганьні. Апошнім часам таксама адчуваў сябе добра. Яшчэ зранку ў дзень перад сьмерцю ў яго не было ні тэмпэратуры, ні сухога кашлю, ні ціску ў грудзях, толькі невялікі насмарк апошнія тры дні. Чытаць цалкам тут>>
Карантын у Літве працягнулі на два тыдні, нашэньне масак стала абавязковым
- Карантын у Літве падоўжылі да 27 красавіка ўключна.
- З 10 красавіка нашэньне масак у грамадзкіх месцах абавязковае.
- Каб абмежаваць сходу людзей у сьвяты, рух перакрыюць з 20 гадзін 10 красавіка да 20 гадзін 13 красавіка.
- Людзі ня змогуць уяжджаць у гарады і населеныя пункты, дзе ў іх няма нерухомасьці. (выключэньне толькі для паездак на пахаваньне, да цяжка хворых або да пацярпелых у выпадку здарэньня і на працу ў іншы горад).