У частцы населеных пунктаў левага берагу Днястра, які кантралююць прарасейскія ўлады Прыднястроўскага рэгіёну, аднавілася цеплазабесьпячэньне пасьля таго, як туды прадпрыемства «Малдовагаз» перапампавала прыродны газ, куплены ў Эўразьвязе.
Як паведаміла Малдоўская служба Радыё Свабода, Кішынёў задаволіў заяўку Тыраспаля ў аб’ёме 2,7 мільёна кубамэтраў газу.
Дзяржаўная кампанія Малдовы «Энэргаком» на падставе распараджэньня Камісіі надзвычайных сытуацыяў пачала купляць на эўрапейскім рынку прыродны газ, які будзе штодня пастаўляць у Прыднястроўе, але не перавышаючы аб’ёму ў 3 мільёны кубамэтраў на дзень, да 10 лютага.
Набыцьцё прыроднага газу ў Эўропе для Прыднястроўя фінансуюць пры дапамозе эўрапейскага гранту, прызначанага выключна для абароненых спажыўцоў, такіх як хатнія гаспадаркі, лякарні, школы і малыя прадпрыемствы харчовай прамысловасьці.
Што будзе пасьля 10 лютага, пакуль незразумела.
У Прыднястроўі пацьвердзілі аднаўленьне цеплазабесьпячэньня. У рэгіёне адмовіліся ад веерных адключэньняў сьвятла, якія ўвялі пасьля спыненьня паставак газу з Расеі праз тэрыторыю Ўкраіны.
Эўразьвяз выдзеліў 20 мільёнаў эўра на набыцьцё газу. Частку гэтага гранту накіруюць на падтрыманьне ў працы блёку Днястроўскай электрастанцыі да 10 лютага.
ГЛЯДЗІЦЕ ТАКСАМА: Малдова знайшла кампраміснае рашэньне для выхаду з газавай блякады Прыднястроўя