Карантын не перашкода. Беларусы працягваюць будаваць дарогі ва Ўкраіне
Дарожна-будаўнічы трэст № 2 Гомля са студзеня пачаў будаўніцтва аб’язной дарогі вакол Роўна — праца не спыняецца, нягледзячы на ўведзены з 12 сакавіка ва Ўкраіне карантын. «Гомельскія дарожнікі працуюць у штатным рэжыме. Яны пражываюць у непасрэднай блізкасьці да аб’екта і мяжы не перасякаюць», — паведаміў Свабодзе прэсавы сакратар Службы аўтамабільных дарог у Ровенскай вобласьці Дзьмітры Леанціюк. Далей па спасылцы >>
Кітайскія экспрэс-тэсты на каранавірус даставяць у Беларусь 1 красавіка
У якасьці гуманітарнай дапамогі Кітай перадасьць Беларусі больш за 2 тысяч тэст-сыстэм, касьцюмы і іншае, паведаміў міністар аховы здароўя Уладзімер Каранік.
Юніёрскі чэмпіянат сьвету ў лёгкай атлетыцы перанесьлі праз каранавірус
Сусьветная лёгкаатлетычная асацыяцыя разам з урадам і фэдэрацыяй лёгкай атлетыкі Кеніі прынялі рашэньне адкласьці правядзеньне чэмпіянату сьвету ў лёгкай атлетыцы сярод юніёраў, які павінен быў прайсьці 7-12 ліпеня ў Найробі, у сувязі з распаўсюджваньнем COVID-19 на міжнародным узроўні. Альтэрнатыўную дату правядзеньня чэмпіянату плянуюць вызначыць у хуткім часе.
Раней World Athletics разам зь Міністэрствам спорту і турызму і Беларускай фэдэрацыяй лёгкай атлетыкі прыняло рашэньне перанесьці ў сувязі з каранавірусам камандны чэмпіянат сьвету ў спартыўнай хадзе, які павінен быў адбыцца ў Менску 2-3 траўня, а таксама тры этапы «Брыльянтавай лігі».
Пандэмія COVID-19: траціна насельніцтва Зямлі ва ўмовах карантыну
Больш за 2,6 мільярда чалавек у дзясятках дзяржаваў сьвету знаходзяцца ў рэжыме абмежаваньняў — перш за ўсё на перамяшчэньне і сацыяльныя кантакты — у сувязі з пандэміяй каранавіруснай інфэкцыі. Увечары 24 сакавіка абмежавальныя захады былі ўведзеныя для 1,3 мільярда жыхароў Індыі.
Чытаць цалкам.
КХЛ датэрмінова завяршыла сэзон з прычыны каранавірусу
Кантынэнтальная хакейная ліга, якая аб’ядноўвае клюбы Расеі, Беларусі, Латвіі, Казахстану, Славакіі, Фінляндыі і Харватыі (па адным), абвясьціла аб датэрміновым завяршэньні сэзону 2019/2020 гадоў у сувязі з эпідэміяй каранавірусу. Кубак Гагарына — галоўны трафэй КХЛ — такім чынам, разыграны ня будзе. Рашэньне аб разьмеркаваньні месцаў па выніках чэмпіянату 2019/2020 будзе прынята на адным з бліжэйшых пасяджэньняў Рады дырэктараў КХЛ.
КХЛ стала адной з апошніх спартыўных ліг, якая спыніла чэмпіянат праз каранавірус. Паўночнаамэрыканская НХЛ і іншыя хакейныя лігі перапынілі свае чэмпіянаты раней.
Белдзяржцырк і Гомельскі цырк адмянілі паказы
Белдзяржцырк адмяніў паказы праграмы «Водная феерыя. Фэнтэзі парк» 28-29 сакавіка і заўчасна завяршыў яе. Прычыны адмены не ўказаныя. Набытыя квіткі можна вярнуць у касах Белдзяржцырку, грошы вернуць цалкам.
Адмяніў свае праграмы і Гомельскі дзяржаўны цырк, набытыя квіткі гледачы могуць вярнуць, гаворыцца ў паведамленьні цырка.
У Магілёве затрымалі мужчыну, які незаконна гандляваў маскамі з Расеі
У Магілёве затрымалі 25-гадовага жыхара Крычаўскага раёна, які прадаваў мэдыцынскія маскі праз інтэрнэт, паведамляе МУС. Паводле праваахоўнікаў, маскі ён купіў у Расеі і перапрадаваў па цане ў некалькі разоў вышэй, чым у аптэках. Канфіскавалі каля 150 масак на агульную суму 150 рублёў, за незаконную прадпрымальніцкую дзейнасьць мужчыне пагражае штраф.
Міністэрства аховы здароўя абвясьціла краўдфандынг. На што пойдуць грошы?
Дабрачынныя рахункі для дапамогі выяўленьню і лячэньню каранавірусу ў краіне Міністэрства здароўя адкрыла 24 сакавіка.
«Сродкі пойдуць на прафіляктыку і на барацьбу з каранавірусам, на само лячэньне, — сказаў карэспандэнту Свабоды галоўны лекар Рэспубліканскага цэнтру арганізацыі мэдыцынскага рэагаваньня Эдуард Вальчук. — На ўсё, што найбольш спатрэбіцца ў пэўны пэрыяд часу.
Патрэбны будуць маскі — значыць, будуць маскі; патрэбны будуць рэсьпіратары — значыць, рэсьпіратары; патрэбны будуць ахоўныя касьцюмы — значыць, касьцюмы. Патрэбны будуць тэсты дадатковыя — будуць набывацца тэсты. Але пакуль прадказаць цяжка».
Паводле Вальчука, на гэты момант пакуль няма канкрэтнага пераліку рэчаў, на якія пойдуць сабраныя сродкі.
«Усё будзе залежаць ад таго, колькі будзе грошай і што будзе найперш неабходна ў пэўны пэрыяд часу. Становішча ж мяняецца, калі гаварыць пра сытуацыю ў сьвеце, то кожную хвіліну нешта новае. Мы гатовыя да ўсяго. Таму пакуль няма канкрэтнага сьпісу, гэта будзе тое, што тэрмінова будзе неабходным».
Эдуард Вальчук адзначыў, што сродкі пойдуць выключна на барацьбу з каранавірусам. Але адкрыцьцё дабрачынных рахункаў «абсалютна не азначае», што не хапае сродкаў у бюджэце.
У Расеі выявілі 163 новыя выпадкі за дзень
Паводле віцэ-прэм’еркі Расеі Тацяны Голікавай, за дзень у Расеі выявілі 163 новыя выпадкі COVID-19. Агулам за ўвесь час там выявілі 658 выпадкаў. Днём раней паведамлялася, што памерла 1 пацыентка памерла, 22 выпісалі здаровымі, у крытычным стане застаюцца 8.
У Маскве, як піша «Інтэрфакс», пацыентам зь лёгкім цячэньнем COVID-19 (тэмпэратура менш за 38,5°С, дыханьне вольнае і яшчэ некалькі крытэраў) дазволяць лекавацца дома. Але на шпіталізацыі пакінуць старэйшых за 65 гадоў, людзей з хранічнымі захворваньнямі і цяжарных, а таксама тых, хто ня можа жыць асобна ад людзей з групы рызыкі.
У ЗША прэзыдэнт і парлямэнт дамовіліся падтрымаць эканоміку ва ўмовах пандэміі 2 трыльёнамі даляраў
Белы дом і сэнатары-дэмакраты дасягнулі згоды наконт законапраекту аб 2 трлн даляраў на падтрымку эканомікі і аховы здароўя ў змаганьні з каранавірусам.
Агенцтва Reuters паведамляе, што галасаваньне ў Сэнаце можа адбыцца 25 сакавіка.
Чытаць цалкам.
У Беларусі выявілі 5 новых выпадкаў COVID-19, яшчэ два пераправяраюць
Міністэрства аховы здароўя Беларусі 25 сакавіка паведаміла ў сваім Telegram сьвежыя лічбы пра колькасьць выпадкаў COVID-19: 29 пацыентаў «выпісаныя або рыхтуюцца да выпіскі», яшчэ 57 «знаходзяцца пад кантролем мэдыкаў і на лячэньні». Яшчэ два выпадкі правяраюць дадаткова.
Учора статыстыкі не агучвалі. Два дні таму Мінздароўя паведамляла пра 81 выпадак COVID-19: 15 выпісаных здаровымі, 61 хворага або пад назіраньнем мэдыкаў. Наймаладзейшаму пацыенту было 2 гады. Тады ж Мінздароўя заклікала да «сацыяльнага дыстанцыяваньня», прасіла людзей старэйшага ўзросту заставацца па магчымасьці дома.
За два дні, паводле міністэрства, выявілі 5 новых выпадкаў, а здаровымі сталі лічыць 14 новых пацыентаў — хворых проста цяпер становіцца менш. Колькасьць «актыўных выпадкаў» цяпер расьце амаль па ўсім сьвеце, зьмяншаецца яшчэ толькі ў Кітаі і Паўднёвай Карэі.
Паводле Мінздароўя, у Беларусі ўжо праведзена каля 23 тысяч тэстаў на COVID-19.
Апоўдні — стрым Мінздароўя для студэнтаў
Беларускім студэнтам раздаюць «анонс-памятку» — 25 сакавіка ў 12.00 на Youtube-канале Беларускага прэс-цэнтру пачнецца трансьляцыя з удзелам міністра аховы здароўя Беларусі Ўладзіміра Караніка, начальніка ўпраўленьня вышэйшай адукацыі Сяргея Касьпяровіча і намесьніка галоўнага доктара Менскай інфэкцыйнай лякарні Алега Скрыпкі.
«Мы ведаем, што студэнты па ўсёй Беларусі актыўна сочаць за разьвіцьцём сытуацыі з COVID-19 у нашай краіне, — пішуць у анонсе. — На жаль, ва ўмовах празьмернага інфармацыйнага шуму вельмі цяжка разабрацца, што з гэтага праўда, а што фэйк».
Трансьляцыя будзе тут.
З антысэптыкамі, бяз масак. Як таксісты працуюць ва ўмовах пандэміі
Інструкцый ад кіраўніцтва не было. Гомельскія таксісты самі ўзброіліся антысэптыкамі і антыбактэрыяльнымі сурвэткамі. Праціраюць рукі пасьля прыёму купюр ад пасажыраў, ручкі аўто, праветрываюць салён.
Таксісты на сабе не заўважылі, але ад кліентаў чулі, што больш людзей сталі езьдзіць на таксі.
Пуцін наведаў «каранавірусную» лякарню ў ярка-жоўтым ахоўным касьцюме
Кіраўнік Расеі Ўладзімір Пуцін наведаў 24 сакавіка ў маскоўскім пасёлку Камунарка лякарню, дзе трымаюць пацыентаў з падазрэньнем на новы каранавірус. Перад уваходам у адну з зонаў лякарні на яго апранулі касьцюм хімічнай абароны.
Пры тым самі лекары былі ў белых касьцюмах, а аднаму Пуціну выдалі ярка-жоўты. Больш фота тут. А мэмы пра гэта ўжо сабрала расейская Meduza.
Трамп спадзяецца спыніць пашырэньне каранавірусу да Вялікадня
Прэзыдэнт Злучаных Штатаў Дональд Трамп выказаў сваю галоўную мэту — аслабіць карантын ужо да Вялікадня, які каталікі і пратэстанты сьвяткуюць сёлета 12 красавіка.
Трамп заявіў, што Белы дом «настойліва працуе» над тым, каб рэалізаваць абяцаньне аслабіць патрабаваньні сацыяльнага дыстанцыяваньня к Вялікадню.
«Маім прыярытэтам заўсёды застаюцца здароўе і бясьпека амэрыканскага народу. Мы працягваем ацэньваць дадзеныя і прымаем рашэньні на падставе таго, што лепш за ўсё адпавядае інтарэсам нашай краіны», — падкрэсьліў ён.
Трамп мяркуе, што ўступленьне ў сілу закону аб абароннай вытворчасьці паслужыць дастатковым «рычагом», каб прымусіць кампаніі пачаць вытворчасьць мэдыцынскіх расходных матэрыялаў.
У ЗША зарэгістравана больш за 52 000 выпадкаў інфікаваньня каранавірусом, ад якога загінулі прыкладна 680 чалавек. За мінулыя суткі ахвярамі COVID-19 сталі 139 асобаў, што зьяўляецца найбольшай колькасьцю сьмерцяў ад пачатку ўспышкі. Найбольшую занепакоенасьць выклікае сытуацыя ў Нью-Ёрку і яго прыгарадах.
Чытайце таксама: Лукашэнка пра каранавірус: Вытрываем да праваслаўнага Вялікадня — значыць, жыць будзем
Беларуская інфэкцыяністка расказала, як у Швэцыі без абвяшчэньня ўсеагульнага карантыну людзей памерла менш, чым там, дзе яго абвясьцілі
Былая прарэктарка Беларускага дзяржаўнага мэдыцынскага ўнівэрсытэту і загадчыца катэдры інфэкцыйных хваробаў пэдыятрычнага факультэту, кандыдат мэдыцынскіх навук, дацэнт Іна Германенка, якая сем апошніх гадоў жыве і працуе ў Швэцыі, у эксклюзіўным інтэрвію Свабодзе кажа, што:
- Швэцыю нельга параўноўваць зь Беларусьсю. Там зусім іншая арганізацыя сыстэмы аховы здароўя. І карантын у Швэцыі ёсьць — для старэйшых школьнікаў.
- У Беларусі трэба ўвесьці карантын для дзяцей і абмежаваць грамадзкія кантакты.
- Да сярэдзіны траўня мы ўбачым спад захворваньняў на каранавірусную інфэкцыю ў Эўропе. Але цыркуляцыя вірусу на гэтым не завершыцца.
- І шмат іншага
Кітай усё яшчэ ўтойвае інфармацыю аб каранавірусе, — Дзяржаўны сакратар ЗША
Майк Пампэо ў інтэрвію радыёпраграме Washington Watch 24 сакавіка раскрытыкаваў тое, як Кітай спраўляецца з успышкай каранавірусу. Ён заявіў, што кіроўная ў КНР Камуністычная партыя па-ранейшаму ўтойвае ад сьвету інфармацыю, неабходную для прадухіленьня новых выпадкаў заражэньня.
Дзяржаўны сакратар у чарговы раз заявіў, што марудлівасьць Пэкіну ў абмене інфармацыяй пра вірус стварыла рызыкі для людзей ва ўсім сьвеце, і сказаў, што гэта «сапраўды паставіла пад пагрозу тысячы жыцьцяў».
«Я занепакоены тым, што гэтае ўтойваньне, гэтая дэзынфармацыя, якой займаецца Камуністычная партыя Кітаю, усё яшчэ пазбаўляе сьвет неабходнай інфармацыі, каб мы маглі прадухіліць паўтарэньне новых выпадкаў», — дадаў Пампэо.
У Італіі аднавіўся рост штодзённых сьмерцяў, у Францыі памерлі ўжо звыш 1000 чалавек
У Італіі да таго два дні запар зьмяншалася колькасьць новых выяўленых выпадкаў COVID-19 і новых сьмерцяў за дзень, ды з 24 сакавіка тэндэнцыя спынілася, аднавілася паскарэньне. За 24 сакавіка там выявілі 5249 новых выпадкаў, 743 сьмерці.
У Францыі агульная колькасьць памерлых ад COVID-19 перавысіла тысячу, за 24 сакавіка там памерлі 240 пацыентаў. Міністар здароўя Францыі адзначыў, што гэтыя лічбы няпоўныя: як перадае RFI, ён прызнаў, што ў дамах састарэлых ня робяць сыстэматычных тэстаў і калі там нехта памірае ад каранавірусу, гэтага выпадку, хутчэй за ўсё ня будзе ў статыстыцы. Лічбы з дамоў састарэлых абяцаюць апублікаваць у найбліжэйшыя дні.
У Злучаных Штатах распаўсюд вірусу працягвае паскарацца, за 24 сакавіка выявілі больш за 11 тысяч новых выпадкаў, а колькасьць сьмерцяў за дзень рэзка падскочыла — да 225.
Лічбы на раніцу 25 сакавіка
- У сьвеце зафіксавалі 422,9 тысячы выпадкаў COVID-19: 81,6 тысячы ў Кітаі, каля 69,2 тысячы ў Італіі, каля 54,9 тысячы ў ЗША, 42 тысячы ў Гішпаніі, 33 тысячы ў Нямеччыне, 24,8 тысячы ў Іране, 22,3 тысячы ў Францыі.
- Ад хваробаў, якія выклікаў новы каранавірус, у сьвеце памерлі 18,9 тысячы чалавек. Зь іх 6820 у Італіі, 3285 у Кітаі, 2991 у Гішпаніі, 1934 у Іране, 1100 у Францыі.
- Выпісалі 109,1 тысячы пацыентаў, якіх вылекавалі ад COVID-19. «Актыўных выпадкаў» хваробы застаецца каля 294,9 тысячы, зь іх 13 тысяч у цяжкім стане.
- У Беларусі на 23 сакавіка пацьвердзілі 81 выпадак інфэкцыі новым каранавірусам (22 «выпісаныя або рыхтуюцца да выпіскі», яшчэ 59 «пад мэдычным кантролем і на лячэньні»). 24 сакавіка Мінздароўя не публікавала статыстыку пра COVID-19.
Кадыраў заявіў, што парушальнікаў карантыну варта было б забіваць
Кіраўнік Чачэніі Рамзан Кадыраў заявіў, што парушальнікаў карантыну ў сувязі з распаўсюджваньнем каранавіруснай інфэкцыі варта забіваць. Словы кіраўніка Чачэніі прыводзіць «Каўкаскі вузел».
На пасяджэньні ўрада Чачні Кадыраў расказаў пра жыхара рэспублікі, які вярнуўся з
паломніцтва ў Мэку і ня стаў выконваць карантыну.
«Калі ў яго гэтая хвароба, тысячамі людзі захварэюць, — сказаў кіраўнік Чачэніі, дадаўшы: — Чалавека, які сам сабе стварае гэтую праблему, калі спытаць мяне, варта было б забіць. Ня толькі сам хварэе, [але і заражае] сваю сям’ю, сваіх сясьцёр, братоў, суседзяў».
Паводле афіцыйных дадзеных, у Чачэніі выяўлены адзін выпадак інфікаваньня каранавірусам, яшчэ ў двух чалавек падазрэньне на інфікаваньне. Двое нядаўна вярнуліся з Мэкі, адзін прыехаў са Стамбула, піша «Медиазона».